O Alondras proclámase vencedor da II copa de fútbol da Deputación nunha disputada final contra o Coruxo no campo de Pardellas

O Alondras proclamouse esta tarde gañador da final da II edición da Copa de Fútbol da Deputación, logo de vencer na quenda de penalties ó Coruxo, nun partido moi disputado que mantivo o marcador igualado a cero ata o asubío final do árbitro.

O conxunto de Cangas necesitou chegar ó cuarto lanzamento dende o punto de penalti para impoñerse ós vigueses, que loitaron ata o último intre por facerse coa vitoria.

O presidente da Deputación de Pontevedra, Rafael Louzán, e o delegado provincial de Deportes, José Enrique Sotelo, foron os encargados de facer entrega dos trofeos de campión e subcampión respectivamente ó Alondras e o Coruxo. Ademais, o gañador percibirá un total de 6.000 euros e o finalista, 5.000 euros.

Así dase por rematada a segunda edición deste trofeo, que reuníu este ano a un total de 27 equipos da provincia, e repartíu un total de 60.000 euros entre os participantes.

Outros actos

A xornada maratoniana do deporte en Ponteareas incluíu, ademais da disputa da final en Pardillas, a concentración de todos os nenos das Escolas Provinciais de Fútbol da Deputación, que xuntou no campo de herba artificial a máis de 400 nenos de toda a provincia. Alí disputáronse ata cen minipartidos ó longo do día.

Tamén houbo actividades para os máis novos, inchables, comida, xogos varios e o final da xornada, todos recibiron unha mochila con equipación deportiva.