Exitoso debut internacional da Selección Galega de Baloncesto en Cadeira de Rodas, que lle gañou 61-55 a China

A selección galega de baloncesto en cadeira de rodas superou a China (61-55) no seu primeiro partido internacional, disputado na cidade da Coruña. Os homes de Antonio Riveiro amosaron un gran nivel de xogo e unha enorme motivación neste choque, no que se enfrontaban a un equipo que está ultimando a súa preparación para os Xogos Olímpicos que, por certo, terán lugar no seu propio país.

O conxunto galego foi por diante no marcador dende o inicio tal e como o amosan os parciais (16-10, 16-13 e 19-18), pero no derradeiro cuarto tocou sufrir un pouco (10-14), xa que nos minutos finais o equipo chinés apertou para mellorar o resultado.

O primeiro cinco inicial galego foi o formado por: Berni Costas, Moncho Pombo, Tesouro, Envo e Mouriz. O resto do equipo é: Agustín Alejos, Santi Comesaña, Javier Gómez, Alberto Fernández “Capi”, Vicky, Pedro Paz e Miguel Romero. O máximo anotador do equipo foi Envo con 19 puntos. 
O choque foi dirixido polos colexiados galegos Jorge González Marqués e Javier González Arias, que non tiveron problema ningún no seu labor.