O Campionato de España de Balonmán, no IFEVI

O campionato de España de balonmán nas categorías infantil e cadete comezará mañá na súa competición, despois de que hoxe se realizara a inscrición de todas as delegacións. Este torneo, que se celebrará no IFEVI, reúne en Vigo a 2.000 deportistas ademais dos familiares que acompañan aos nenos e nenas na competición, aproveitando as datas festivas. 

Nesta primeira xornada de competición debutarán as catro seleccións galegas (infantil e cadete, tanto masculina coma feminina e a directora xeral para o Deporte, Marta Souto, desprazarase ata o IFEVI para acompañar aos equipos galegos na súa estrea. O equipo infantil masculino galego debutará ás 12:00 contra Catalunya, mentres que ao conxunto feminino lle corresponderá facelo ás 13:30 horas contra Andalucía. Mentres, no caso dos cadetes, o equipo masculino xogará contra Catalunya ás 16:00 horas e o feminino fronte a Andalucía (17:30 horas). 

Ademais da competición, intensiva nos pavillóns do IFEVI, mañá tamén comezarán as xornadas “A formación do xogador/a como obxectivo”, a partir das 10:45 horas. No acto de inauguración das xornadas estará presente a delegada provincial da Consellería de Cultura e Deporte da provincia de Pontevedra, María Xesús López Escudeiro. A primeira ponencia correrá a cargo de Xesco Espar, técnico do F.C. Barcelona, e ten o título de “Como se forma a intelixencia do xogador”