O Karpin Galicia, moi activo na primeira etapa

Manuel Cardoso (Liberty Seguros) adxudicouse a primeira etapa da 3ª Volta ao Distrito de Santarém (Portugal), que uniu as localidades de Fátima e Abrantes, a través dun itinerario de 201,9 quilómetros. O corredor portugués convértese tamén no primeiro líder da carreira, con 9 segundos sobre Héctor Guerra (Liberty Seguros) e Khalilov (Flaminia), segundo e terceiro, respectivamente. O Karpin Galicia, que situou a Vorganov e Veloso nos postos doce e trece na etapa, tivo moita presenza en carreira, ao estar representado por Rabuñal e Isaychev nas dúas fugas máis significativas da xornada.

O ciclista de Arteixo (A Coruña) foi o primeiro en probar fortuna con certo éxito, destacándose no quilómetro 38 de etapa en compañía de Zaballa (A) e Joachim (Astana). O pelotón non deu tregua ao trío que, non obstante, sería capaz de manter viva a aventura durante 25 quilómetros.

Tras novos intentos de escapada efémeros, era outro ciclista do Karpin Galicia, Vladimir Isaychev, quen tomaba a cabeza de carreira en compañía do francés Maxime Bouet (Agritubel). A etapa transitaba polo quilómetro 121 e no 145 o dúo conseguiu unha diferenza máxima de 5-47. Isaychev puntuaría primeiro na meta volante de Pego e segundo nas dúas cotas de montaña de cuarta categoría. A dez quilómetros de meta o pelotón poñía fin á fuga, neutralizando ao francés. Isaychev fora acadado cinco quilómetros antes.

A victoria decidiuse nunha chegada co último quilómetro en suba, que estirou moito ao pelotón e onde Cardoso avantaxou en 2 segundos a Héctor Guerra (Liberty Seguros) e Khalilov (Flaminia). A 6 segundos chegaba o galego David Blanco (Palmeiras Resort), no décimo posto, e a 9 os corredores do Karpin Galicia Vorganov (duodécimo) e Veloso (décimo terceiro), xunto co estradense Alejandro Marque (Palmeiras Resort), que ocupou a décimo sexta praza. Na xeral, as bonificacións dan 10 segundos máis de vantaxe a Cardoso sobre a representación galega.

A segunda etapa disputarase entre Río Maior e Benavente sobre 192,4 quilómetros.