Este martes, 15 de xullo, volve o boxeo importante ao pavillón vigués das Travesas, mercede á disputa do título Intercontinental do peso mosca da W.B.O. entre Iván Pozo, púxil de Vigo, e o brasileño Darli Gonçalves Pires. Se gaña Pozo, volvería a estar entre os cinco mellores do mundo, o que lle daría opcións de volver a aspirar ao cetro mundial en poucos meses, igual que sucedera en maio diante do campión arxentino Narváez.
Pero, ademais do combate estelar, na velada do martes haberá outros de profundo atractivo para os espectadores, e moi trascendentais. Polo título Intercontinental dos galos enfróntanse o colombiano Franklin Therán, residente en España que suma 26 vitorias noutros tantos enfrontamentos, e o ecuatoriano Darío Azuaga, 23-3. Buscando o título mundial W.B.O. júnior do peso superlixeiro, o francés Ali Chebah e o brasileiro Carlos Santos de Jesús, pelexa a dez asaltos.
Máis. En supergalos, Kiko Martínez fronte o húngaro Zsolt Nagy; en supermedios, os españois Roberto Santos e José Yebres; na modalidade feminina, Soraya Sánchez, campioa de España, e a romanesa Floarea Lihet. E o cuarto, mención especial, Jorge Araújo contra o colombiano José Urbanes, no que supón o regreso do tamén vigués aos cuadriláteros logo dun tempo afastado.
O espectáculo boxístico iníciase ás 20.00 horas. Prezos a partir de 10 euros. Os billetes xa están á venda, tanto no centro comercial Gran Vía como no pavillón das Travesas; o mesmo día da velada, os billetes permanecerán á venda no propio pavillón dende as 09.00 horas de xeito ininterrompido.
