O Kayak Tudense despraza 23 piragüistas ao Galego Júnior e Cadete de Ribadavia

Este vindeiro domingo, 13 de xullo, dispútase en Ribadavia (Ourense) o Campionato Galego Júnior e Cadete de piragüismo, sobre as distancias de 1000 e 500 metros, ao que o Club Kayak Tudense desprazará 23 deportistas co obxectivo de rematar entre os tres primeiros da clasificación xeral por clubs. As posibilidades do Kayak en terras ourensás van ser menores que o serían en condicións máis normais, é dicir, se puidese dispoñer de todos os piragüistas cos que conta nas categorías das que estamos a falar.
Pero varios dos membros do equipo júnior estarán ausentes o domingo. Por fortuna, diríase, pois están concentrados coa selección española, casos de Óscar Carrera, Leti Piña e Diana Freiría, que esta mesma fin de semana estarán na Copa do Mundo de maratón, en Crestuma (Portugal); ou Silvia Vázquez e Joan Ardit, concentrados co equipo español en Avilés e Madrid, de xeito respectivo, inmersos na preparación do Europeo Júnior que tendrá lugar a próxima semana en Szeged (Hungría).
Malia esas importantes ausencias, no propio club agárdase que os cadetes desenvolvan un bo papel en modalidades como o c1, masculino e feminino, con Adrián González, Luis Morais, Carla Pérez ou Silvia Rodríguez; asimesmo, hai optimismo respecto das posibilidades dos júnior Valeria Romero (cadete que competirá na categoría júnior), Sabela Castro e Luis Blanco.
No que respecta ás embarcacións de dúas prazas, o c2 de Adrián González e Luis Blanco é firme candidato ao ouro, ao igual que o k2 de Carla Pérez e Silvia Rodríguez, e o k2 dama júnior de Valeria Romero e Sabela Castro.
Nas embarcacións de 4 piragüistas, en principio a única embarcación do Club Kayak Tudense con opcións de pódio é o k4 cadete de Rubén Millán, Abrahám Fernández, Isaac Rodríguez e Jesús Fernández.

O Kayak Tudense desprazará 23 piragüistas ao Galego Júnior e Cadete de Ribadavia