Óscar Carrera (Kayak Tudense), prata K1 na Copa do Mundo

Óscar Carrera, piragüista do Club Kayak Tudense, acadou esta fin de semana a medalla de prata na proba K1 júnior pertencente á Copa do Mundo de Maratón disputada en Crestuma (Portugal). O deportista de Tui logrou a medalla formando parte do equipo español de piragüismo, no que tamén estaban outras compañeiras súas do club de Tui, que sen embargo non foron quen de subir ao podio.
Na regata de K1 júnior, dende un principio quedou claro que tanto Óscar coma o extremeño Fausto Moreno serían os que se xogasen o triunfo. Escapáronse e fóronse alternando na cabeceira da proba ata o remate, no que Moreno andivo máis fino e gañou. O bronce nesta proba, para o británico Mark Chidestrone.
A tudense Ana Varela saíu forte na súa proba, mais tivo que abandoar na segunda parte da carreira a causa de serios problemas co achicador da auga.
En K2, as xuvenís Leti Piña e Diana Freiría obtiveron un excelente quinto posto. Trátase dunha parella que este ano, o do seu debut na categoría, veñen de lograr estrearse tamén co equipo español.