A Bandeira El Corte Inglés de Traiñeiras dispara o seu interese logo de gañar o Naútico en Rianxo

A XXVII Bandeira El Corte Inglés, que se disputa este domingo en Vigo, adquire aínda máis atractivo porque na tarde do sábado, na Bandeira de Rianxo, o Real Club Náutico de Vigo, plantoulle cara a Samertolameu de Meira na cuarta proba da Liga Galega de Traiñeiras e logrou impoñérselle. Os de Moaña sumaban tres triunfos noutras tantas regatas e agora quizais comezen a xurdirlles as dúbidas sobre a súa absoluta superioridade. Ademais, Náutico xoga na casa este domingo.
Tamén Mecos mostrou o sábado a súa progresión na Liga cun merecido terceiro posto, por diante de Rianxo, Chapela e Esteirana.
Ás 17.30 horas deu comezo a competición na localidade coruñesa. C.R. Vilaxoán, C.R. Vila de Cangas e C. R. San Felipe foron os primeiros en ver a saída. Logo das tres viradas, Vilaxoán levouse a quenda, oito segundos por diante de Vila de Cangas e vinte por enriba dos rapaces de San Felipe.
Na segunda tanda, dous minutos despois da primeira, sairían Amegrove C. R., C.R. Coruxo, e C. M. Bueu. Coruxo e Amegrove desmarcáronse de Bueu logo da segunda virada. Ao final foi Coruxo o que conseguiu rematar a quenda en primeira posición; Amegrove chegou a meta cinco segundos despois e Bueu pechou a manga.
C. R. A Cabana, C. R. Ares, C. R. Puebla, A. D. Esteirana e C. Regatas Perillo comezaron a competir ás 18.00 horas na terceira quenda. O mellor tempo entre os catro participantes foi o marcado por Esteirana, que se colocaba á cabeza da clasificación momentaneamente; tras el chegou Puebla e moi preto del Perillo. A Cabana e Ares quedaron terceiro e cuarto respectivamente na tanda.
A derradeira quenda do día quedaba reservada para os mellores da Liga. C. R. Rianxo, S. D. Samertolameu, R. C. Náutico de Vigo, C. R. Chapela e C. R. Mecos mostraron a súa calidade cunha regata moi competida. Despois dunha saída nula, as embarcacións comezaron a competir. Náutico de Vigo tomou vantaxe sobre Samertolameu na primeira baliza, e conseguiu aumentarla na segunda delas –catro segundos por diante dos de Meira-; na terceira, a distancia seguiu aumentando. Porén, Samertolameu recuperouse e disputou man a man os derradeiros metros co Náutico. Finalmente, por pouco máis de 20 décimas de segundo, os de Vigo pasaron por diante a liña de meta.